June yog Lub Hli Hais Txog Qub Txeeg Qub Teg Ntawm Neeg Nkag Tebchaws. Peb ua kev zoo siab rau cov kev pab uas cov neeg nkag tebchaws tau tsim rau peb cov keeb kwm thiab kab lis kev cai uas sib koom.
Elvia ua haujlwm ntawm peb pawg saib xyuas Kev Pabcuam TswvcuabNws qhia peb txog nws zaj dab neeg nyob rau hauv qhov kev tshaj tawm no.
Koj tau tsiv lub tebchaws twg los thiab tsiv thaum twg?
Kuv tsev neeg tsiv tawm ntawm Zacatecas, tebchaws Mexico nyob rau xyoo 1977. Peb nyob rau hauv Phoenix, Arizona thaum xub thawj. Nyob rau xyoo 1981, peb tsiv mus nyob rau Salinas hauv xeev California.
Kev nyob rau lub tebchaws Meskas raws li yog ib tug neeg nkag tebchaws nws zoo li cas xwb?
Thaum tseem yog meyuam yaus, kuv tau tawm tsam nrog cov teeb meem ntsig txog hom lus. Thaum kuv cov nus muag thiab kuv pib mus kawm ntawv thiab kawm paub txog kev nyeem, kev sau thiab kev hais lus Askiv, ces txhua yam yooj yim dua tuaj. Peb txhais lus rau peb niam peb txiv raws li qhov tsim nyog.
Dab tsi yog yam uas koj xav hais tias yog cov teeb meem loj tshaj plaws uas cov neeg nkag tebchaws yuav ntsib thaum muaj kev hloov kho lub neej nyob rau hauv tebchaws Meskas?
Qee yam ntawm cov teeb meem loj tshaj plaws yog:
- Cov teeb meem ntsig txog hom lus.
- Kev nrhiav tau txoj haujlwm them nyiaj zoo los mus txhawb tsev neeg.
- Kev nrhiav tau qhov chaw xis nyob.
Feem ntau cov neeg nkag tebchaws tsuas ua haujlwm hauv tej liaj teb thiab tau nyiaj tsawg. Kev ua haujlwm hauv tej liaj teb yog yam nyuaj heev. Tsis yog txhua leej yuav ua tau li ntawd.
Yam dab tsi txog ntawm koj cov qub txeeg qub teg uas koj txaus siab tshaj plaws rau?
Kuv txaus siab heev rau peb cov suab paj nruag Mev thiab khoom noj khoom haus. Kuv pog tau muab qee yam qauv zaub mov zoo tso rau kuv niam, thiab kuv niam tau muab rau kuv. Kuv yuav muab tej ntawd rau kuv cov menyuam.
Koj qhov kev paub dhau los ntawm kev yog neeg nkag tebchaws tau qhia txog koj qhov kev sib fim li cas nrog/kev sib koom rau cov tswvcuab? Thiab koj txoj haujlwm nyob rau ntawm lub Alliance?
Qhov kev paub dhau los ntawm kev yog neeg nkag tebchaws ua rau kuv muaj lub siab ruaj nrees rau yam uas peb cov tswvcuab tab tom ua mus. Kev loj hlob nrog kuv cov nus muag thiab kuv niam kuv txiv hauv ib lub tsev me uas muaj ob chav pw yog yam nyuaj. Thaum kuv loj hlob tuaj, kuv mam paub tias kuv niam kuv txiv tau ua haujlwm hnyav npaum li cas peb thiaj li tau nyob lub tsev loj dua thiab zoo dua. Kuv niam kuv txiv ua hauj lwm txog ntua thaum peb muaj peev xwm tsiv tau mus rau lub tsev muaj plaub chav pw.
Qhov kev paub dhau los ntawm kev yog neeg nkag tebchaws ua rau kuv muaj lub siab ruaj nrees rau yam uas peb cov tswvcuab tab tom ua mus.
Lub sijhawm uas kuv tseem hluas, kuv tau xav txog qhov yuav ua li cas kuv thiaj tuaj yeem pab tau kuv niam kuv txiv kom nkawv thiaj tsis txhob khwv heev dhau. Kuv tau pib ua haujlwm tom thaum mus kawm ntawv los. Kuv muab kuv cov nyiaj hli rau kuv niam kuv txiv txhawm rau pab nkawv.
Thaum xub thawj nkawv tsis kam lees txais kuv cov nyiaj, tab sis tom qab ntawd nkawv kuj txais lawm. Ob peb xyoos dhau mus, kuv pom tau hais tias kuv niam kuv txiv khaws tau cov nyiaj ntawd mus yuav ib lub tsheb rau kuv thiab kuv tus nus.
Txawm zaj dab neeg yuav zoo li cas los xij, cov tsev neeg nkag tebchaws tsis tso tseg kev sib pab ... mus tag ib sim!
Tom qab kuv kawm tiav tsev kawm theem siab, kuv tau paub hais tias kuv xav pab lwm tsev neeg xws li kuv tsev. Kuv tau pib ua haujlwm hauv kev pabcuam rau cov neeg siv kev pabcuam rau ntau yam lag luam sib txawv. Kuv tau kawm paub thiab txais kev cob qhia txhua lub sijhawm kom tau txais kev paub thiab kev kawm paub ntau ntxiv.
Kuv nyiam ua haujlwm ntawm lub Alliance heev, uas muab kev pabcuam rau cov neeg siv kev pabcuam ntxiv mus lawm yav tom ntej! Nyob rau kuv cov kev sib fim nrog cov tswvcuab, kuv paub tau tias muaj pes tsawg tus neeg nkag tebchaws tso npe thov txog nyiaj muas noj, CalFresh, Cashaid/CalWorks, Medi-Cal lossis Covered California yam tsis paub txog cov txiaj ntsig pab txhua yam ntawm cov kev pabcuam ntawd.
